Gerbert Kunst ta despedí di e puesto na Representashon di Hulanda na Willemstad entrante promé di mart 2027. Su enkargo riba e puesto ta terminá mas trempan riba su propio petishon, debí na sirkunstansianan privá. Riba 15 di mei 2025 a apuntá Gerbert Kunst komo Representante di Hulanda na Aruba, Kòrsou i Sint Maarten.
Imágen: © Vertegenwoordiging van Nederland
Gerbert Kunst:
“E último añanan mi por a eksperensiá den e parti karibense di Reino kon bo por yega na resultado ku konekshon i igualdat. Mi a hasi esaki ku hopi plaser. For di e konvikshon fuerte ku komo kuater pais den reino ku ta partner igual nos por logra mas ku individualmente. Huntu ku mi koleganan na Representashon di Hulanda na Willemstad, Oranjestad i Philipsburg, mi a dediká mi mes pa entre otro fortifiká desaroyo ekonómiko, duna sosten na sektornan sosial i tópiko manera seguridat di kuminda, durabilidat i resistensia pa krísis. E vínkulo kaluroso ku mi a desaroyá den tur tres pais lo mi keda kuné pa semper. Pero, tin biaha tin buèlta inesperá den bida i esei ta pone ku mi ta sinti mi fòrsá pa regresá Hulanda.”
Barbera Wolfsenberger, direktor general di Relashon den Reino:
“Ta lamentabel ku Gerbert ta tuma despedida di e puesto na Willemstad mas trempan. Mi ta apresiá ku e ta dispuesto pa posponé su partida ku algun luna. Mi a siña konosé Gerbert komo un hòmber ku hopi entusiasmo i komprometí, ku kurason pa Reino i un persona konektadó importante pa nos partnernan serka gobièrnu-, empresa-, institutonan di konosementu i e sektor sosial.”
Representante suplente na Aruba, Kòrsou i Sint Maarten Marieke van der Linden ta tuma e enkargo komo Representante suplente entrante promé di mart. Debí na e regreso trempan, di tur dos banda a buska un funshon nobo na Hulanda. Entrante promé di mart Gerbert ta bira e direktor nobo di ‘Kennis, Internationaal, Europa en Macro-economie (KIEM)’ i tambe Direktor di e ‘Cluster Bestuursondersteuning’ na Ministerio di Asuntunan Interno i Relashonnan den Reino (BZK).