Riba 1 i 2 di òktober representantenan di Aruba, Kòrsou, Hulanda, Saba, Sint Eustatius i Sint Maarten a reuní na Kòrsou pa deliberá tokante establesimentu di un Plataforma Union Europeo (EU-Platform) nobo. E islanan den e parti karibense di Reino tin e status di Pais i Teritorio Ultramar (Landen en Gebieden Overzee, LGO). Representashon di Hulanda na Willemstad a organisá e enkuentro.
representantenan di Aruba, Kòrsou, Hulanda, Saba, Sint Eustatius i Sint Maarten
E ophetivo di e EU-platform ta pa posishoná Reino Hulandes mas mihó na Brussel, asina por hasi mihó uso di oportunidat ku Union Europeo ta ofresé LGO. Pa Union Europeo e LGO tin balor stratégiko grandi komo puesto eksterno den un mundo ku ta kambiando hopi lihé. Pa e LGO tin oportunidat partikularmente den fondonan europeo.
Punto di salida pa e deliberashon ta outonomia di e paisnan i kada un su relashon komo LGO ku e Komishon Europeo. Representante Permanente di Reino Hulandes na Union Europeo na Brussel tambe a tabata presente na e enkuentro. E representashon aki ta di gran balor pa parternan den Reino ora ta trata di hasi uso di oportunidat na Brussel i por duna un bon bista den strategia di Komishon Europeo. Esaki ta dirigí mas i mas riba impakto geopolítiko – un tereno kaminda partinan karibense di Reino por tin un ròl importante.
Mirando tur esaki a sigui papia tokante e posibel aktividatnan di e EU-platform. Esakinan por ta dirigí riba (huntu) monitoriá calls for proposals relevante pa e fondonan Europeo horizontal, invershon den e nesesidat di training di e LGO i kompartí konosementu presente, informashon i ret. E próksimo tempu e shete parternan den Reino lo sigui traha huntu riba e tópikonan aki.