Djamars 15 di sèptèmber, e Representante di Hulanda na Aruba, Kòrsou i Sint Maarten a para ketu na e asina yamá Prinsjesdag, Dia di Presupuesto di Hulanda, durante un resepshon na su residensha. Tambe el a para ketu na e koperashon ku Kòrsou. E koperashon aki ta tantu riba nivel atministrativo komo ku e komunidat empresarial i e sosiedat sivil. Represntante Sr. Gerbert Kunst a delineá un kantidat di plan pa e aña benidero.
Imágen: Ramsay Soemanta
Representante di Hulanda, Sr. Gerbert Kunst
Pakete di Pais
“Ta un bon notisia pa e tres paisnan outónomo den Karibe ku a krea espasio pa sigui ku e Paketenan di Pais. Lo mi ke yam’é un ‘Pakete di Pais 2.0.’ E no ta simplemente un kontinuashon di loke tabata eksistí kaba, pero un fase nobo den kua nos ta konstruí riba loke nos a logra miéntras ku simultáneamente ta permití espasio pa nesesidat spesífiko pa kada pais. Pa Kòrsou, un Pakete di Pais 2.0 asina lo por sirbi tambe komo e fundeshi pa un agènda di koperashon mas amplio Ku Hulanda.”
Koperashon
Sr. Kunst a menshoná diferente ehèmpel di koperashon den detaye. El a resalta forma eksistente di kolaborashon i a señalá unda tin potensial pa mas. Esaki ta konta entre otro pa atendé seguridat di kuminda, fortalesé resiliensia di e parti Karibense di Reino i invertí den sosiedat sivil.
“Pasó si den di nos Reino ta konfrontá e mesun retonan sosial, dikon kada un di nos mester reinventá e wiel? Esei ta presis kaminda nos por fortalesé otro—dor di kompartí konosementu i eksperensia, interkambiá mihó práktika, i uni forsa kaminda e ta agregá balor di bèrdat.”
Meskos ta konta pa e ambishon kompartí di e parti Karibense di Reino i Hulanda pa atraé mas rekurso finansiero for di Bruselas; kaminda pronto ta establesé un plataforma di Plataforma Europeo.
“Bo ta logra e mihó resultado ora bo asuntunan ta na òrdu i ora—kaminda ta posibel—bo ta presentá un frente uní ku un narativo fuerte i ta fungi komo un solo tim. Esei, pa ami, ta e idea tras di e fase nobo aki den nos koperashon: no hasi tur kos huntu, pero kolaborá kaminda e ta hasi nos mas fuerte.”
Den e kuadro aki el a referi tambe na e kumbre na novèmber próksimo, kaminda e kuater paisnan di Reino tin komo meta pa profundisá nan koperashon. E kumbre aki ta bai bira un tradishon anual.
“Di e manera aki, nos ta duna supstansia na e prinsipio: nos ta un reino. Pasobra koperashon no ta un akshon di un biaha; e ta un proseso kontinuo di skucha, siña i konstruí huntu.”
Pa terminá
“Si tin un kos ku a laga un impreshon riba mi for di e aña ku a pasa, ta esaki: Kòrsou ta poseé un forsa inkreibel. Den su hendenan. Den su empresarionan. Den su organisashonnan di sosiedat sivil. Den su hubentut. Den su kultura. Nos ròl komo e Representashon no ta pa tuma over e forsa ei. Nos ròl ta pa reforsá esaki unda ku nos por hasié asina huntu ku mi ta mira pa nos plaser ta grandi. koperashon den e aña benidero.”