Promé Minister Jetten lo bishitá Sint Maarten, Saba, Sint Eustatius, Boneiru, Aruba i Kòrsou di 8 pa 14 di mei 2026. Esaki lo ta e promé bishita di Sr. Jetten na e parti karibense di Reino den su kalidat di Promé Minister. E bishita ta tuma lugá nèt na inisio di e periodo di gabinete, debí na e importansia ku gabinete ta duna na un bon i fuerte koperashon den Reino.
Durante e bishita e Promé Minister lo hiba kombersashon ku tur e Promé Ministernan, gobernantenan, i miembronan di Parlamento di Aruba, Kòrsou, i Sint Maarten, i tambe gezaghèber i Konseho Insular di Boneiru, Sint Eustatius i Saba. E kombersashonnan aki lo trata entre otro tópikonan manera resiliensia, seguridat i sostenibilidat. Adishonalmente, e bishita ta inkluí un programa diverso ku ta inkluí charla ku habitante, empresario i organisashonnan sosial.
Imágen: Martijn Beekman
Promé Minister Jetten
Sint Maarten
E bishita ta kuminsá na Sint Maarten, unda ku lo informá e Promé Minister riba e temanan di rekonstrukshon, kumplimentu di lei, bon gobernashon, i kolaborashon durante kalamidat i krísis. Tambe e lo papia ku diferente organisashon tokante asuntunan relevante pa sosiedat, manera hubentut, kuido i bienestar, turismo i empresario, i NGO’s.
Saba
Djadumingu 10 di mei, e Promé Minister ta biaha pa Saba. Einan, entre otro, e ta bishitá Saba Cares Nursing Home, kaminda e ta papia ku residentenan di edat avansá tokante nan bida den e kas di kuido. Tambe, e lo bishitá St. Johns Enrichment Center, kaminda ta konstruyendo un sentro di komunidat multifunshonal meimei di edifisionan di skol eksistente riba e isla.
Sint Eustatius
E siguiente dia, e Promé Minister ta sali pa Sint Eustatius, kaminda e ta bishitá e terminal di transbordo di zeta i ta hasi un kaminata den sentro enfoká riba e isla su historia di sklabitut i herensia kultural. Durante e kaminata, ta pone atenshon na e selebrashon di Statiaday 2026, konmemorando 250 aña di lasonan ku Merka. Ku ‘The First Salute’, Hulanda tabata e promé estado pa rekonosé Merka komo un estado independiente.
Boneiru
Djamars 12 di mei e Promé Minister lo bishitá Boneiru. Aki, e ta bishitá e lèntfel di Selibon Lagun i ta haña un aktualisashon riba enseñansa na skol básiko Kolegio San Bernardo. Despues di un enkuentro na LVV Boneiru tokante un sistema di kuminda ku ta kla pa futuro i duradero, lo tuma lugá un rekorido di un proyekto di konstrukshon di bibiendanan sosial.
Aruba
Mas lat e dia ei, e Promé Minister ta biaha pa Aruba. Den oranan di anochi, e lo presensiá e estreno ofisial di e dokumentario tokante Aruba su naturalesa, parti di e proyekto multimedia WOW! tokante e parti karibense di Reino. Djárason 13 di mei ta riba programa bishitanan na Parke Nashonal Arikok, e Sentro Deportivo Libertador Betico Croes, i un bishita di negoshi den kuadro di e skema nobo di BMKB ACS. Promé Minister ta konkluí su bishita na Aruba ku un rekorido na Aeropuerto Reina Beatrix i ta sali pa Kòrsou.
Kòrsou
Na Kòrsou, lo informá e Promé Minister riba e retonan (sosial) riba e isla durante un reunion di sena ku organisashonnan sosial i komunidat empresarial. E mainta di 14 di mei ta kuminsá ku un reunion informativo na Base Naval Parera tokante e situashon geo-polítiko den Karibe. Despues lo sigui un bishita na Museo Tula. Den oranan di atardi, e Promé Minister lo atendé un reunion riba revitalisashon di bario. Tambe e lo hasi un rekorido dor di e parke di bateria nobo di e kompania di energia Aqualectra.