Eric van der Burg, sekretario di estado di Asuntunan Interno i Relashonnan den Reino, di 7 te ku 17 di aprel, ta bishitá e seis islanan karibense di Reino. Susesivamente e ta bishitá Sint Eustatius, Saba, Sint Maarten, Aruba, Kòrsou i Boneiru. Temanan ku lo trata durante e bishita di introdukshon di e sekretario di estado ta entre otro, gobernashon efikas, siguridat, resistensia ekonómiko, kolaborashon den Reino i siguridat di kuminda.
Imágen: © Rijksoverheid / Martijn Beekman
Durante su bishita e sekretario di estado lo sera konosí mas di aserka ku entre otro gobernante- i representantenan di pueblo. Ademas e ta bishitá diferente proyekto, inkluyendo konstrukshon di e haf nobo Black Rock na Saba, e preparashonnan pa selebrashon di 250 aña di First Salute na Sint Eustatius i proyektonan den kuadro di trabounan di rekonstrukshon despues di orkan Irma na Sint Maarten. Tambe e ta kombersá ku representantenan di organisashonnan sosial na Kòrsou i e Komité di Konmemorashon Pasado di Sklabitut. Na Aruba e ta haña un rekorido na entre otro Sunny Greenz, un empresario agrikultor hóben. Na Boneiru e ta bishitá e lèntfel di Selibon na Lagun i e ta papia ku e habitantenan den bisindario.
Durante su bishita na Aruba, sekretario di estado Van der Burg ta partisipá na e ‘LGO-EU Forum’. Esaki ta un plataforma internashonal pa diálogo entre Union Oropeo i e Pais- i Teritorionan Ultramar (LGO). E evento aki ta trese esnan responsabel pa maneho, diplomátiko- i akadémikonan di e área karibense, Oséano Pasífiko, Oséano Indio i region Antártiko huntu. E konferensia ta enfoká riba kolaborashon stratégiko riba tereno di kresementu ekonómiko duradero, estado di derecho, adaptashon klimatológiko i transformashon digital.