Sekretario di Estado di Finansa Sandra Palmen ku ta enkargá ku Toeslagen en Herstel ta hasi un bishita di trabou di 25 te ku 28 di yanuäri 2026 na Kòrsou. Durante su bishita e ta papia ku mayornan ku a keda perhudiká finansieramente dor di e asina yamá toeslagenaffaire na Hulanda, ku organisashonnan ku ta sostené e mayornan i ku diferente representante di gobièrnu di Kòrsou.
Beeld: Valerie Kuypers
Kinderopvangtoeslagaffaire
Tin mayor ku aktualmente ta biba den eksterior, pero den pasado a risibí sobresuèldo pa krèsh, e asina yamá kinderopvangtoeslag. Den algun kaso a stòp e sobresuèldu pa krèsh entre 2005 i 2019 i mayornan a haña nan mes den problema finansiero. Meskos ku mayornan perhudiká na Hulanda nan tambe tin derechi riba rekonosementu, kompensashon finansiero, ayudo i sosten. Na Kòrsou ta trata di 275 famia. Mundialmente 1.454 famia a registrá for di 43 diferente pais.
Sosten dirigí
Mayornan perhudiká den eksterior ta risibí kompensashon finansiero dor di e daño ku nan a sufri, meskos ku mayornan perhudiká na Hulanda. Na Hulanda munisipionan ta duna e sosten. Mayornan perhudiká den eksterior ta haña sosten dor di e Team di Sosten di Eksterior (Ondersteuningsteam Buitenland, OTB). Na Kòrsou tambe esaki ta e kaso. Por ehèmpel si nan tin pregunta tokante famia, salú, finansa trabou i entrada òf bibienda. Banda di esei, miembronan di famia tambe por risibí sosten riba e temanan aki. Huntu ku OTB e víktima ta wak kiko ta su nesesidat i kua yudansa ta yuda mas mihó. Sekretario Palmen ta na Kòrsou pa wak kon e proseso di rekuperashon ta bayendo i kiko mas tin mester pa sostené e mayornan.
Aserkamentu na Kòrsou
Ku 275 famia, 20 porshento di tur perhudikado den eksterior ta na Kòrsou. Komo ku Kòrsou ta forma parti di Reino Hulandes, Sekretario di Estado Herstel & Toeslagen a yega na akuerdo spesífiko pa yuda mayornan yega na solushon pa nan debenan. Kaminda ta posibiel ta yega na akuerdo integral tokante bibienda, trabou i salú. Esaki ta duna e famianan un base pa sigui ku nan bida na un mihó manera na Kòrsou.