Siman pasá un delegashon di ‘Nationaal Cyber Security Centrum Nederland’ (NCSC-NL), bou di guia di direktor general Matthijs van Amelsfort, a hasi un bishita di trabou na Kòrsou. Eefje Zents, direktor di Koperashon di Resiliensia Digital na NCSC, tambe tabata forma parti di e delegashon. E bishita tabata den kuadro di interkambio di konosementu, koperashon i fortifikashon di resiliensia sibernétiko den Reino.
Imágen: © Vertegenwoordiging van Nederland
Direktor general di Nationaal Cyber Security Centrum Nederland, Matthijs van Amelsfort
No ta un luho, sino nesesidat
Durante e Siman di Maneho di Krísis na Kòrsou, Van Amelsfort a tene un diskurso prinsipal tokante importansia di resiliensia sibernétiko den un komunidat ku ta digitalisando mas i mas. El a enfatisá ku menasanan sibernétiko no konosé frontera i ku kolaborashon den Reino ta esensial pa garantisá siguridat digital.
"Resiliensia sibernétiko no ta un luho, sino un nesesidat pa gobièrnu, kompania i siudadano. Uniendo forsa nos por reakshoná mihó riba menasa i protehá nos infrastruktura digital", Van Amelsfort a bisa.
Responsabilidat komun
Aparte di e konferensia, e delegashon di NCSC a bishitá diferente ministerio i organisashon den sektornan vital na Kòrsou. Durante e kombersashonnan akí a kompartí ‘best practices’ i a diskutí posibilidatnan pa mas koperashon. E bishita asina pues no tabata un evento aislá. Punto di atenshon partikular tabata e Ret di resiliensia sibernétiko. NCSC ta enfatisá ku resiliensia sibernétiko ta un responsabilidat komun i ta hasi un yamada riba tur organisashon na Kòrsou i den Reino hinter, pa partisipá aktivamente na e Ret di resiliensia sibernétiko. Kompartiendo konosementu i kolaborando huntu, Reino den su totalidat por bira mas resistente pa menasanan digital.
Sinku prinsipio básiko
NCSC ta konsehá organisashonnan, sin importá grandura, pa tuma komo punto di salida sinku prinsipio básiko pa resiliensia digital. Si apliká nan konsekuentemente, bo ta fortifiká protekshon di bo sistema- i datonan.
- Identifiká riesgonan
Ora bo identifiká bo riesgonan, bo sa kiko bo tin ku protehá i kua medidanan ta apropiá al respekto.
- Promové komportashon sigur
Konsientisá kolaboradónan di e riesgonan i pèrkurá pa un ambiente sigur pa mèldu insidente.
- Protehá sistema-, aparato i aplikashonnan
Skohe pa konfigurashonnan seif i keda vigilá bo serkania, di manera ku bo ta siñalá problemanan na tempu.
- Manehá akseso
Duna bo kolaboradónan solamente akseso na dato i servisio ku ta nesesario pa nan hasi nan trabou.
- Prepará bo mes
Ensayá diferente senario, traha regularmente back-up i tèst esakinan tambe. Asina bo por reakshoná i drecha rápido.
Hopi insidente digital ta ser okashoná debí ku e medidanan di protekshon básiko no ta na òrdu. Esei ta di lamentá, pasobra hopi bia ku pasonan relativamente simpel, ya bo por hasi bo organisashon digitalmente mas resistente kaba.