Tur aña Representashon di Hulanda na Aruba, Kòrsou i Sint Maarten ta kontribuí ku un total di EURO 250.000 na instansianan karitativo den e tres paisnan. Pa medio di e Fondo pa Proyekto Chikí (Kleine Projecten Fonds, KPF) fundashonnan por hasi un petishon pa kontribushon te un máksimo di 5000 florin pa sostené nan proyekto. E enfoke di esaki ta proyektonan ku ta na benefisio di desaroyo sosial di hóben, organisashon di bario, deporte i kultura, i proyekto ku ta kontribuí na resilensha di nos komunidat (manera kombatí pobresa, kuido i seguridat di kuminda). Ainda tin espasio na Kòrsou pa hasi petishon pa un kontribushon chikitu den e lastu kuartal di e aña aki. Esaki por te ku 20 di novèmber 2025.
Imágen: © Vertegenwoordiging van Nederland
E otorgashon di e supsidio na Café Magic a kai pareu ku e bishita di nos tim nashonal di futbòl
Tur fundashon ku ta inskribí na Kamará di Komersio por hasi un petishon. E aña aki Representashon di Hulanda a hasi algun fundashon den e tres paisnan kontentu ku un kontribushon for di e fondo di KPF.
Nos ta menshoná algun proyekto na Kòrsou ku a haña supsidio for di KPF. Asina Sentro di Bario Otrobanda a haña fondo pa aktividat despues di skol pa muchanan den bario, Welcome Home Foundation a haña kontribushon pa duna sosten mental i físiko dirigí riba mucha, hóben i adulto ku ta haña tratamentu di kimoterapia i Café Magic a risibí fondo ku ta kontribuí na programa di enseñansa i trabou pa personanan ku un limitashon (mental).
Representante di Hulanda Sr. Gerbert Kunst ta indiká: “Nos ta orguyoso riba tur proyektonan bon i importante ku nos por duna sosten. I nos ta spera ku nos por yuda mas organisashon bunita e aña aki.”
Fundashonnan por hasi petishon dor di download e formulario di petishon for di website www.vnacs.nl of pidi esaki via di vnwinfo@minbzk.nl.