Edson Hato ta tuma despedida komo representante VNACS
WILLEMSTAD - Sr. drs. E. (Edson) Hato, MBA, a anunsiá ku e ta sigui su karera otro kaminda. Entrante promé di desèmber 2024 e ta tuma despedida komo Representante di Hulanda na Aruba, Kòrsou i Sint Maarten.
Sr. Hato:
“Mi a kumpli ku e ròl di Representante di Hulanda na Aruba, Kòrsou i Sint Maarten ku hopi pashon. Un periodo edukativo i intensivo, durante kua mi a traha pa yega na un kolaborashon fruktífero entre e kuater paisnan den Reino. Ounke mi ta di akuerdo ku e meta final di e kolaborashon aki – un bon relashon entre e paisnan – mi tin un punto di bista diferente riba kon nos por logra e meta ei. Pa e motibu ei, despues di bon konsulta mi a disidí di entregá mi asignashon. Den e tempu benidero mi lo enfoká riba e siguiente pasonan den mi karera. Mi ta gradisí tur hende pa e kolaborashon den e periodo tras di lomba.”
Sr. Lapperre, direktor-general Relashon den Reino:
“Na promé lugá mi ke gradisí señor Hato pa su esfuersonan. Ku alma i kurason e la komprometé su mes na Reino. Naturalmente mi ta respetá su desishon, ta gradisié pa e kolaborashon plasentero i ta dese’é tur kos bon ku e siguiente paso den su karera.”
For di promé di sèptèmber 2023 sr. Hato tabata Representante di Hulanda na Aruba, Kòrsou i Sint Maarten, stashoná na Willemstad.