Sekretario di Estado Zsolt Szabó ta hasi promé bishita di trabou pa Aruba, Kòrsou i Boneiru
Di 11 pa 16 di ougùstùs 2024 sekretario di estado Zsolt Szabó di Relashonnan den Reino i Digitalisashon ta hiba un bishita di trabou pa Aruba, Kòrsou i Boneiru. Esaki ta e promé bishita di trabou di e sekretario di estado nobo pa parti Karibense di Reino. Despues tambe ta sigui un bishita pa Islariba. E promé bishita aki ta prinsipalmente pa sera konosí ku e islanan i mandatarionan. Durante su bishita e sekretario di estado lo sera konosí ku entre otro gobernadornan, promé ministernan i otro ministernan di Aruba i Kòrsou i tambe gezaghèber di Boneiru.
Aruba
E bishita di trabou di sekretario di estado Szabó ta kuminsá riba 11 di ougùstùs na Aruba, kaminda e ta sera konosí ku gobernador Alfonso Boekhoudt, promé minister Evelyn Wever-Croes i e otro ministernan di e Gabinete Wever-Croes. Tambe Zsolt Szabó ta topa presidente di parlamento Edgar Vrolijk i e ta sera konosí ku parlamentarionan miembro di e komishon di Relashonnan den Reino. Tambe riba agènda tin un bishita na prizòn KIA i Archivo Nacional Aruba, un rekorido den San Nicolas i un enkuentro ku representantenan di mundu empresarial. Tambe e sekretario di estado ta haña un presentashon di progreso di e Pakete Nashonal.
Kòrsou
Riba djamars, 13 di ougùstùs e sekretario di estado ta biaha pa Kòrsou, kaminda tin un programa yen ta ward’é. E ta sera konosí ku gobernador Lucille George-Wout, promé minister Gilmar Pisas i e otro ministernan di Gabinete Pisas i ta topa presidente di parlamento Charetti America-Francisca i parlamentarionan miembro di e komishon di Relashonnan den Reino. Mas aleu e sekretario di estado ta haña un rekorido di e isla, durante kua ta para ketu na vários desaroyo (ekonómiko). Tambe tin un enkuentro planiá ku e Komishon Nashonal di Reforma i ku presidente di Banko Sentral di Kòrsou i Sint Maarten. Por último e sekretario di estado ta topa partnernan riba tereno di Hustisia i ta bishitá base di Marina na Parera kaminda e ta haña un presentashon di e trabou di Wardakosta.
Boneiru
Despues di Kòrsou e sekretario di estado ta sigui pa Boneiru, kaminda e tin un enkuentro ku e gezaghèber nobo John Soliano i Representante di Reino suplente Jan Helmond. Durante e bishita aki e ta sera konosí tambe ku e miembronan di Kolegio Ehekutivo i miembronan di Diálogo Sentral, un órgano konsultativo lokal di dunadó di trabou, sindikato, gobièrnu lokal i Kámara di Komèrsio. Tambe e ta pasa na parti nort di Boneiru, saliña i Marine Park Bonaire.
Riba djabièrnè 16 di ougùstùs sekretario di estado Szabó ta regresá Hulanda.