Preparashon pa krísis den e partinan karibense di Reino
Di 21 te ku 24 di mei a tuma lugá na Den Haag e di tres edishon di e ‘Siman di Maneho di Krísis den e partinan karibense di Reino’. Ministerio di Asuntunan Interno i Relashonnan den Reino i ministerio di Hustisia i Siguridat a organisá e siman. Diferente representante di organisashonnan di krísis di e 6 islanan Aruba, Boneiru, Kòrsou, Sint Maarten, Saba i Sint Eustatius, kolaboradó di diferente ministerio i partner di kadena manera ‘Landelijk Operationeel Coördinatie Centrum’ (LOCC) i ‘Urban Search and Rescue Team’ (USAR.NL) a bini huntu.
E siman a kuminsá ku un ehersisio di dilema, den kua partisipantenan mester a praktiká ku tomo di desishon difísil. Despues tabatin presentashon- i diskushonnan interesante tokante maneho di krísis. Tambe a hasi un bishita di trabou na LOCC i ‘Koninklijk Nederlands Meteorologisch Instituut’ (KNMI). LOCC ta forma parti di ministerio di Hustisia i Siguridat i ta ehersé un papel importante entre otro den kaso di insidente, desaster i krísis (inter)nashonal òf den kaso ku tin menasa ku esakinan por tuma lugá. KNMI ta entre otro responsabel pa traha imágennan di tempu, pa Hulanda Karibense tambe.
E partisipantenan a haña importante ku durante e Siman di Maneho di Krisis nan por a interkambiá konosementu, eksplorá mas profundo e posibilidatnan pa kolaborashon i hasi palabrashonnan tokante esaki i pa tin kontakto ku representantenan di otro organisashonnan di krísis. Kolaborashon i preparashon tabata sentral henter e siman. Kolaborashon ta importante, sigur den tempu di krísis. Ora un desaster òf krísis presentá, ta importante pa ta prepará. Un bon preparashon ta kondusí na un mihó maneho di krísis. E partisipantenan ta mira bèk riba un Siman di Maneho di Krísis eksitoso.