Bishita di trabou di Sekretario di estado Van Huffelen na e parti karibense di Reino
Sekretario di estado Alexandra van Huffelen di Relashonnan den Reino i Digitalisashon ta bishitá Aruba, Boneiru, Saba, Sint Eustatius i Sint Maarten di 26 te ku 31 di mei. Segun espektativa esaki ta su último bishita di trabou na e islanan. E bishita ta den kuadro di e Konsulta di Gobernadornan na Aruba, seramentu di un akuerdo atministrativo na Boneiru i apertura ofishal di un proyekto di konstrukshon di bibienda sosial na Saba.
![Staatssecretaris BZK - Alexandra van Huffelen](/binaries/medium/content/gallery/vnacs/banner-afbeeldingen/nieuws/alexandra-van-huffelen-830x260.jpg)
Konsulta di Gobernadornan na Aruba
Na Aruba e sekretario di estado ta partisipá na e konsulta ku e tres gobernadornan di Aruba, Kòrsou i Sint Maarten. Esaki ta un konsulta regular, periódiko, ku ta formalmente inkluí den e Reglamentu di Gobernadornan. Na Aruba e sekretario di estado ta bishitá Universidat di Aruba, unda e lo haña un rekorido den e edifisio di Maria Convent resientemente renobá, riba ‘campus’ di e universidat. Ku un kontribushon di mas di 7 mion euro di Union Oropeo a transformá e edifisio akí den un fasilidat di enseñansa moderno. Durante su estadia na Aruba e sekretario di estado tin un enkuentro ku e komunidat ‘queer’ riba e isla i lo sera konosí ku e prokuradó general nobo di Aruba.
Boneiru, Saba i Sint Eustatius
Riba 28 di mei e sekretario di estado ta firma e akuerdo atministrativo nobo ku Boneiru. Un par di komponente ku ta resaltá ta e programa ‘Traha riba Bienestar i Prosperidat, e impulso èkstra na protekshon i desaroyo di papiamentu, e enfoke riba kresementu i desaroyo ekonómiko manehabel i e ambishon pa logra un akuerdo regional (Regiodeal) pa Boneiru. Na Boneiru e sekretario di estado lo kombersá ku abitantenan tokante biba ku un limitashon riba e isla.
Na Sint Eustatius i Saba e sekretario di estado ta kombersá ku e kolegionan ehekutivo di e islanan tokante progreso i implementashon di e akuerdonan atministrativo di 2023. Na Sint Eustatius e sekretario di estado lo bishitá diferente lugá ku ta parti di e ‘regiodeal’. Ta probechá di e bishita pa papia ku esnan embolbí tokante progreso i solushon di e problemátika di kabritu riba e isla.
E bishita na e islanan ta den kuadro tambe di e progreso den realisashon di konstrukshon di bibienda pagabel i planifikashon di tereno riba e islanan. Riba 30 di mei e sekretario di estado ta hasi apertura na Saba di e proyekto di konstrukshon di bibienda ‘Under the Hill 2’. Tambe e sekretario di estado ta bishitá un futuro sitio di konstrukshon pa konstrukshon di bibienda pagabel.
Sint Maarten
E bishita ta terminá 31 di mei na Sint Maarten unda ta tuma lugá un enkuentro ku miembronan di e gabinete, entretantu demishonario, di Sint Maarten.