Minister Dijkgraaf riba mishon di konosementu na Aruba i Kòrsou
Robbert Dijkgraaf, minister di Enseñansa, Kultura i Siensia, ta na Aruba i Kòrsou di 8 pa 12 di aprel pa dirigí un mishon di konosementu. Huntu ku institutonan edukativo Dijkgraaf ke fortifiká kolaborashon den edukashon i investigashon entre Hulanda, e paisnan den Reino i Hulanda Karibense. Mas konsiensia di e efektonan di e pasado di sklabitut tambe ta para sentral.
Dijkgraaf:
“Mi ta ansioso pa profundisá i ekspandé e kolaborashon riba e tereno di enseñansa i siensia. Kolaborashon intensivo ku e parti Karibense di Reino, ku nos tin un konekshon históriko profundo kuné, ta esensial. Afortunadamente, riba tereno di enseñansa tin hopi moveshon pa adelanto den nos relashon. Den e último añanan nos a logra pone bon paso, ku inisiativa bunita manera e Beka di Reino. Awor ta importante pa nos kontinuá ku esaki. Ta importante pa tene kuenta tambe ku e pasado di sklabitut. Esei tin konsekuensia den henter e komunidat. E aña di konmemorashon ta duna mas konsientisashon di esaki.”
Mihó konekshon ku merkado laboral
E mishon di konosementu ta konsistí di direktor di 10 instituto di MBO, skol avansá i universidat i representante di NWO, KNAW i De Jonge Akademie. Huntu ku nan Dijkgraaf ta bishitá Aruba promé. Ei e enfoke ta riba e konekshon di enseñansa riba e merkado laboral: e situashon aktual, pero prinsipalmente tambe kon e oferta di enseñansa por konektá mihó ku e nesesidatnan di e merkado laboral.
Tambe na Aruba ta papia ku ekspertonan tokante di enseñansa permanente (di bida largu) i enseñansa adishonal (bijscholen). Kua forma di enseñansa por usa pa esaki? Tur e sektornan den e área (MBO, HBO, WBO) ta partisipá.
Finalmente, e tema di mobilidat di studiante ta bini dilanti: asina studiante ku a hasi uso di e Beka di Reino nobo den e promé ròndu ta kompartí su eksperensia. Entrante e aña di estudio benidero, alrededor di 120 studiante pa aña por partisipá na un interkambio òf un stazje dentro di Reino ku e beka aki, destiná pa oumentá e interkambio di studiante di korto durashon. Un total di 25 studiante ta hasi uso di e servisio e aña aki.
Efektonan di pasado di sklabitut
E pasado di sklabitut ainda ta laga su marka pa loke ta trata enseñansa i investigashon. Hopi studiante karibense ta atrasá, algu ku ta sali na kla den e transishon difísil pa studia na Hulanda. Durante un seshon temátiko, dirigí pa e universidatnan karibense, ta pata ketu na e efektonan di e pasado di sklabitut. E meta ta pa duna mas komprenshon i konosementu di e pasado di sklabitut.
Deklarashon di intenshon tokante kolaborashon entre institutonan
Na Kòrsou e institutonan di enseñansa di Hulanda i e islanan ta traha riba un deklarashon di intenshon. Konhuntamente nan ta deseá di bai eksplorá e posibilidatnan di kolaborashon dentro di Reino. E eksplorashon aki mester kondusí na mas palabrashon.
No ta trata solamente di enseñansa, na Kòrsou tambe tin investigashon i siensia riba e programa. KNAW, NWO, De Jonge Akademie i investigadónan di e parti Karibense di Reino ta buska input pa un agènda di konosementu, pa asina promové e posibilidatnan di investigashon riba temanan sosial aktual na e islanan Karibense. Ta papia di intensifikason di kolaborashon riba tereno di investigashon ku e parti Karibense di Reino, i eventual finansiamentu di esaki. Durante e seshon lo tene kuenta ku e bareranan ku ‘postdocs’, studiante di master i ‘promovendi’ ta eksperensiá, por ehèmpel akseso na finansiamentu pa investigashon.
NWO ta traha riba e posibilidat pa proyekto di korto plaso, motivá pa kuriosidat. E eksperensianan di hóben investigadó karibense tambe ta sentral den esaki. Nan ta yuda pensa kon nan por haña mihó sosten. Pa e grupo aki di investigadónan hóben, NWO ta bai desaroyá posibilidatnan di finansiamentu pa investigashon di promoshon dentro di e programa 'Caribbean Research'.
Oumentá éksito den estudio
Te konkluí e mishon di konosementu na e konferensia di trabou di SEA (Strategic Education Alliance). E meta di e plataforma aki di e kuater paisnan den Reino ta pa oumentá e éksito den estudio i igualdat di chèns di studiante karibense. Durante e konferensia studiantenan karibense lo papia i entre otro lo trata e pregunta kon enseñansa sekundario na e islanan por ta mas konektá ku trayekto di enseñansa ku ta sigui.
E mishon di konosementu pa e área karibense ta e di tres despues di e mishonnan anterior pa Indonesia i Sur Afrika. E bishitanan aki a fortifiká e kolaborashon bilateral ku e paisnan konserní i entre e institutonan di enseñansa i di konosementu.