Sekretario di Estado Alexandra van Huffelen ta bishitá Aruba, Kòrsou i Sint Maarten
Di 19 te ku 26 di mart 2024 Sekretario di Estado Alexandra van Huffelen di Relashonnan den Reino ta realisá un bishita di trabou pa Aruba, Kòrsou i Sint Maarten. Pa gran parti e bishita aki ta den lus di e Akuerdo Mutuo Kolaborashon pa Reformanan. Den e kuadro aki na tur tres pais e Sekretario di Estado ta hiba kombersashon ku e minister presidente i otro ministernan tokante e kolaborashon i ehekushon i progreso di e Pakete di Pais. Tambe e mandatario ta papia tokante di e apertura di e Fondo Nashonal di Kresementu i e areglo di SDE++ pa e paisnan.
Aruba
E bishita di trabou di Sekretario di Estado Van Huffelen ta kuminsá na Aruba, na unda e mandatario tin un kombersashon planiá ku promé minister Evelyn Wever-Croes tokante di e Akuerdo Mutuo Kolaborashon pa Reformanan i e fondonan di invershon. Tambe tin un kombersashon ku minister Xiomara Maduro di Finansa tokante di impuesto riba e programa i e Sekretario di Estado ta haña presentashon ku ta trata e reorganisashon di gobièrnu, e kombenio di kuido i enseñansa. Mas aleu e mandatario tin un enkuentro informal ku e lidernan lokal di proyektonan di e Pakete di Pais.
Kòrsou
Riba 21 di mart e Sekretario di Estado ta biaha pa Kòrsou, na unda e ta kombersá ku promé minister Gilmar Pisas tokante e Akuerdo Mutuo Kolaborashon pa Reformanan i e fondonan di invershon. Tambe e mandatario ta papia ku minister Larmonie-Cecilia di Desaroyo Sosial, Labor i Bienestar, Van Heydoorn di Enseñansa, Siensia, Kultura i Deporte, Silvania di Finansa i Martina di Maneho di Gobernashon, Planifikashon i Servisio Públiko tokante e proyektonan di e Pakete di Pais. Ku promé minister Pisas i minister Cijntje di Desaroyo Ekonómiko e Sekretario di Estado ta papia tokante di refineria i tambe e mandatario ta bishitá dos skol ku a renobá ku rekurso finansiero di Hulanda.
Por último e Sekretario di Estado ta partisipá na e konferensia legislativo di Karibe, ku e kuater paisnan a organisá konhuntamente i tambe e tin un enkuentro ku empresarionan i e sosiedat sivil di Kòrsou.
Sint Maarten
E programa na Sint Maarten ta kuminsá riba djaluna 25 di mart; riba e dia aki e Sekretario di Estado ta papia ku promé minister demisionario Silveria Jacobs tokante di e kolaborashon relashoná ku e Akuerdo Mutuo Kolaborashon pa Reformanan i e apertura di e fondonan di invershon. Tambe e mandatario tin un lùnch pa tuma despedida di e gabinete demisionario di Sint Maarten i e ta sera konosí ku e lidernan di frakshon nobo. Tambe riba agènda tin un bishita na e University of Sint Martin i un seshon ku un grupo di enfoke di hóbennan profeshonal tokante di kambio di klima.
Riba djamars 26 di mart 2024 Sekretario di Estado Van Huffelen ta biaha bèk pa Hulanda.