Konsulta eksitoso tokante koperashon hudisial ku Aruba, Kòrsou i Sint Maarten
Riba 17 di yanüari 2024 e Konsulta Hudisial di Kuater Partido (JVO) semestral a tuma lugá entre e minister hulandes pa Protekshon Hurídiko (Weerwind) i minister di Hustisia i Asuntunan Sosial di Aruba (Tjon), minister di Hustisia di Kòrsou (Hato) i minister di Hustisia di Sint Maarten (Richardson). E konsulta a tuma lugá na Kòrsou bou di presidensia di e pais ei.
E paisnan den Reino ta trahando intensivamente riba diferente tema, entre otro e forma di atendé ku kriminalidat supversivo organisá, migrashon, koperashon entre reshèrshi i polis i mehorashon di e kadena di mantenshon hudisial. JVO ta kontribuí na un koperashon efektivo riba e terenonan akí i ta di sumo importansia pa e kadena hudisial na Hulanda Karibense. Debí na e eskala chikitu di e diferente islanan, koperashon regional ta esensial. E delegashon Hulandes ta konsistí di entre otro Hefe di Kuerpo di Kuerpo Polisial Hulanda Karibense (KPCN) i Fiskal Mayó di Ministerio Públiko BES (OMBES).
E ministernan a papia riba funshonamentu i e presupuestonan di e diferente institutonan (komun), manera Recherchesamenwerkingsteam (RST), Stichting Beheer ICT Rechtshandhaving (SBIR) i Ministerio Públiko. A para ketu tambe na ehekushon di e Areglo Mutuo di e Kadena di Imigrashon, e progreso pa loke ta trata aserkamentu atministrativo di supversividat i lantamentu di e Plataforma Supversividat Karibe.
Durante e konsulta a trata ademas e tema di kuido forénsiko. E grupo di trabou Kuido Forénsiko di JVO a duna un update di su trabou. E grupo di trabou akí tin komo tarea pa konsehá riba kuido forénsiko pa hóben i adulto den e parti karibense di Reino. Komo ku kuido di salú mental i kuido forénsiko pa gran parti ta koinsidí ku otro, e grupo di trabou di JVO a buska kooperashon ku e grupo di trabou di ggz di e konsulta di kuater pais di e ministernan di kuido di salú di Reino. Durante e JVO e ministernan a hasi un yamada riba e grupo di trabou pa traha huntu ku e grupo di trabou di ggz riba un proposishon pa kuido forénsiko i kuido sigurá.
Ademas tabatin riba agènda e desbalanse den e kadena di mantenshon hudisial den e parti karibense di Reino. Durante JVO-nan anterior Aruba, Kòrsou i Sint Maarten a señalá un kresementu desbalansá, kaminda prioridat i kapasidat no ta konektá bon ku otro. E grupo di trabou Desbalanse di JVO a analisá e desbalanse durante e periodo ku a transkurí i a determiná un kantidat di posibel solushon. E ministernan a pidi e grupo di trabou pa eksplorá e solushonnan akí i pa bin ku un konseho den e próksimo JVO.
Hulanda lo organisá e próksimo JVO ku lo tuma lugá na yüni 2024.