Refinansiamentu di fiansa di covid Kòrsou, Sint Maarten i Aruba
Hulanda ta ofresé pais Kòrsou, Sint Maarten i Aruba pa refinansiá e fiansanan ku nan a risibí pa enfrentá e konsekuensianan di e pandemia di corona. E fiansanan aki, total di 1,17 bion euro, ta kaduká riba 10 di òktober di e aña aki. Si e paisnan bai di akuerdo ku e proposishon hulandes, nan ta haña e posibilidat pa distribuí e pago bèk den un tempu mas largu, na e interes aktual. Esaki ta nesesario pa e paisnan por sigui paga fasilidatnan importante pa su abitantenan. Sekretario di estado Alexandra van Huffelen ta manda un karta tokante esaki awe pa Tweede i Eerste Kamer.
Konseho di minister di Reino for di aña pasá kaba a tene kuenta ku e paisnan pa motibu di e grandura di e fiansanan i ku bista riba rekuperashon di finansa públiko, lo no por paga esaki bèk kompletamente riba e fecha final. Pa e motibu ei, gobièrnu hulandes a disidí na komienso di e aña aki di ofresé e paisnan refinansiamentu kompletu.
Kondishonnan di refinansiamentu
Pa bini na remarke pa refinansiamentu faborabel i un interes abou, e paisnan mester kumpli ku algun kondishon. A puntra kada pais pa mustra kon e ke sigui fortifiká su ekonomia den e añanan benidero. Entre otro dor di elaborá un kuadro ekonómiko di mas aña (Meerjarig Economisch Kader) ku mester duna un bista di invershon i reforma planiá. Tambe Hulanda ta puntra pa un kalkulashon independiente di e refinansiamentu, pa por determiná e karga di debe pa kada pais. Sint Maarten ta e promé ku a finalisá e kalkulashon di e refinansiamentu. For di esaki a sali na kla ku e finansa públiko lo ta vulnerabel ainda e añanan benidero. Pa e motibu aki, ta ofresé e fiansa ku un periodo liber di pago i ta duna Sint Maarten e posibilidat pa paga e fiansa den un tempu mas balansá.
Akuerdonan tokante supervishon finansiero den un Rijkswet (Lei di Reino)
Banda di e kondishonnan general aki, tin algun kondishon spesífiko mas pa kada pais. Aruba por ehèmpel, mester bai di akuerdo ku un Rijkswet (Lei di Reino), den kua ta regla e supervishon finansiero di manera duradero. Komo ku no tin un akuerdo atministrativo ku Aruba riba un Rijkswet (Lei di Reino), ta ofresé Aruba e fiansa na un interes mas haltu (6 - 8%). Esaki ta korespondé ku e interes ku Hulanda lo a pidi di pais ku un ‘creditrating’ komparabel. Tambe Aruba no a presentá un kalkulashon di e refinansiamentu ainda. Si Aruba disidí di tur manera pa bai di akuerdo ku un Rijkswet (Lei di Reino), e tambe ta bini na remarke pa un interes mas abou na balor di mas o ménos 3,1%. Si Aruba presentá un kalkulashon, por palabrá pa personalisá e struktura di e fiansa i pago.
Problematika di Ennia Kòrsou i Sint Maarten
Pa Kòrsou i Sint Maarten ta asina ku mester tin un akuerdo atministrativo riba un plan di reskate finansiero realístiko pa kompania di seguro di penshun Ennia. Na e momentu aki e kompania di seguro di penshun aki ta enfrentá un défisit di kapital enorme, ku ta menasá di kòrta den 30.000 asegurado na Kòrsou i Sint Maarten. Si e kompania di seguro di penshun aki bai fayit, lo tin konsekuensia sosial ekonómiko grandi pa abitante di e paisnan aki. Hulanda ta dispuesto pa brinda tur dos e paisnan aki un fiansa pa hasi un reinisio posibel i ku esaki ofresé siguridat na e aseguradonan na Kòrsou i Sint Maarten.