Edson Hato representante nobo di Hulanda na Aruba, Kòrsou i Sint Maarten
Konseho di minister, riba nominashon di sekretario di estado Van Huffelen di Asuntunan Interno i Relashonnan den Reino (BZK), a aprobá nombramentu di señor Edson Hato komo Representante nobo di Hulanda na Aruba, Kòrsou i Sint Maarten. Señor Hato ta kuminsá entrante 7 di sèptèmber ku su trabou.
Edson Hato (53) tin eksperensia amplio den dirigí proseso di kambio i desaroyo di liderazgo den ‘multinationals’ grandi, ‘tech scale-ups’ i empresa sosial. Hato a duna konseho na i a traha pa entre otro Carlsberg Group, SAP, ABN AMRO Bank, ING Group i AstraZeneca. For di 2017 Hato ta fundadó i doño di LikeMinds B.V., un kompania di konseho pa guia di ehekutivo, desaroyo di organisashon i transformashon di empresa. E la krese na Kòrsou i tin konosementu di e idioma i kultura den e área karibense.
E funshon di Representante ta krusial pa un bon relashon entre Hulanda, Aruba, Kòrsou i Sint Maarten. Sekretario di estado Van Huffelen ta kontentu ku e nombramentu:
“Edson Hato ta un profeshonal entusiasmá ku ta trese un kantidat di eksperensia internashonal balioso kuné. Mi ta spera ku e vishon ku e tin riba kolaborashon, e lo hunga un ròl importante den konektá i traspasá bareranan geográfiko i diferensianan kultural. Nos ta deseá un bon kolaborashon ku Kòrsou, Aruba i Sint Maarten. Mi ta kontentu ku nos a haña un kandidato pa e puesto aki ku konosé ámbos banda di oséano bon.”
‘Igualdat, responsabilidat i komunidat’
Edson Hato ta bai pa resultado duradero i ta mira pa su mes un ròl importante ora ta trata di kolaborashon dentro di Reino pa futuro:
“Mi ta orguyoso di por sigui fortifiká e kolaborashon entre Aruba, Kòrsou, Sint Maarten i Hulanda komo representante hulandes. Banda di esaki mi ta rekonosé mi mes kompletamente den e puntonan di salida riba kua e kolaborashon aki ta basá: responsabilidat, igualdat i komunidat. Esaki segun ami ta e prinsipionan primordial ora di kambio. Pa sa unda bo ke bai, ta importante pa ta konsiente di unda bo ta bini. Mi ‘background’ i eksperensia a siña mi ku nos mester hasi uso di e forsa di e diferensianan, pa fortifiká otro dentro di Reino. Solamente asina bo ta yega na solushon nobo i inspirador ku hende lo ke sigui traha p’e.”
Representashon di Hulanda na Aruba, Kòrsou i Sint Maarten (VNACS)
VNACS ta representá Hulanda i ta kontribuí na un bon relashon entre Hulanda, Aruba, Kòrsou i Sint Maarten (e paisnan). E Representashon, ku lokalidat na Willemstad (VNW), Oranjestad (VNO) i Philipsburg (VNP), ta traha na realisashon di maneho hulandes pa e paisnan. Tambe VNACS ta splika tokante di e maneho, informá interesado i kontribuí na e ehekushon. VNACS tambe ta brinda ayudo i asistensia na hulandes den situashon di emergensia i ta kordiná e ayudo ku ta bini for di Hulanda durante krísis grandi. E Representashon ta ehekutá su tareanan den estrecho kolaborashon ku tur kuater pais dentro di Reino.
