Paisnan den Reino ta dal paso pa mehorá éksito di estudio pa studiante di Karibe
E 4 paisnan di Reino (Aruba, Kòrsou, Hulanda i Sint Maarten) ke introdusí un beka di reino na nivel di mbo, hbo i wo pa mehorá e interkambio di studiante den reino. Ku sosten finansiero di e beka nobo aki hóbennan di por ehèmpel e parti Karibense di reino por sigui un estudio na Hulanda mas fásil. E beka di reino ta un di e medidanan ku ke bai introdusí pa mehorá e éksito di estudio pa studiante di Karibe.
E ministernan di Enseñansa di e 4 paisnan a ekspresá e intenshon aki durante e Vierlandenoverleg di Enseñansa, Kultura i Siensia ku ta tuma lugá anualmente. E aña aki esaki a tuma lugá na Kòrsou. Pa Hulanda minister Dijkgraaf (OCW) a partisipá.
Diferente investigashon ta mustra ku hopi studiante di Karibe ta enfrentá èkstra barera durante su estudio na Hulanda. Kousa di esaki ta tantu enseñansa preparatorio den parti Karibense di reino, komo estudio avansá na Hulanda.
Minister Dijkgraaf: “Ta importante ku nos ta ofresé hóbennan di e islanan un mihó perspektiva dor di hasi uso di e forsa di Reino. Pa e motibu ei mi ta kontentu ku nos ta bai tuma pasonan konkreto pa mehorá éksito di estudio di studiante. Mi ta konvensí ku di bèrdat nos por yuda ku esaki.”
Interkambio di studiante
Awor un studiante di Aruba, Kòrsou, Sint Maarten òf Hulanda Karibense (Boneiru, Saba, Sint Eustatius) por bai tur pais Oropeo ku un beka di Erasmus+, ku eksepshon di Hulanda. E 4 paisnan ke drecha e situashon aki. Interkambio mutuo temporal ta guia na mas komprenshon i balorashon. Pa e motibu ei a palabrá pa yega na un programa di mobilidat nobo pa studiantenan den reino, pa por ehèmpel Erasmus+. E beka di reino nobo mester hasi mobilidat na nivel di mbo, hbo i wo posibel, tantu entre e islanan komo ku Hulanda. E mobilidat aki tambe ta konta pa stazje. E intenshon ta pa hasi e montante di beka meskos ku e programa di Erasmus, teniendo kuenta ku studiante ku ménos rekurso finansiero.
Preparashon pa estudio
Pa hopi studiante di Karibe e paso pa un estudio avansá awor ta (muchu) grandi. Pa prepará nan mihó pa un estudio di hbo i na universidat, nos ke agrupá e inisiativanan eksistente pa un aña pre- akadémiko i sigui desaroyá esaki den un ‘Caribbean academic orientation year’. E programa di preparashon aki di un aña ta enserá tantu aspektonan akadémiko komo bida komo studiante. E ophetivo ta ku e tres universidatnan den Karibe ta ofresé un programa konhunto, i kaminda ta deseá esaki den kolaborashon ku hbo i universidatnan di Hulanda. Riba término mas largu mester mehorá e enseñansa sekundario ora ta trata di e paso pa enseñansa avansá.
Por último e ministernan a palabrá ku ta hasi investigashon na mehorashon di e konekshon entre enseñansa i merkado laboral. Enseñansa avansá na e parti Karibense di reino no ta bon konektá na e merkado laboral. Den bon konsulta entre e paisnan lo sigui desaroyá e proposishonnan den e tempu benidero.