Habrimentu preliminar i konteo di voto na e büró di vota pa medio di karta na Kòrsou
E büró di vota pa medio di karta na Kòrsou lo kuminsá ku habrimentu preliminar di e dokumentonan di votashon otro siman i lo pasa pa e konteo di e votonan depositá pa elekshon pa Tweede Kamer na Kòrsou riba 22 di novèmber. Tantu habrimentu preliminar di e dokumentonan komo e konteo lo tuma lugá durante un seshon públiko.
Habrimentu preliminar
Durante habrimentu preliminar ta habri e ènvelòp di retur koló oraño. Ta komprobá/verifiká balides di e voto pa medio di karta i e kopia di dokumento di identidat òf pasport. Aki no ta konta e votonan ainda.
Riba djaluna 20 di novèmber i djamars 21 di novèmber e habrimentu preliminar lo tuma lugá di 8:30’or di mainta pa 4:00’or di atardi. Ta suspendé e seshon entre 12:00’or i 1:00’or di mèrdia.
Riba djárason 22 di novèmber entrante 3:00’or di mèrdia, e habrimentu preliminar di e último ènvelòpnan di retur ku a drenta ta tuma lugá.
Konteo di voto
Na momento di konteo di voto, ta habri e ènvelòpnan blanku i ta konta e karchinan di vota.
Riba djárason 22 di novèmber, for di 08:00’or di mainta, e büró di vota pa medio di karta na Kòrsou ta kuminsá ku konteo di e votonan. E konteo aki ta kontinuá te na momento ku konta e último voto i kompletá tur prosedura. Ta suspendé e seshon públiko aki di 12:00’or pa 1:00’or di mèrdia i despues atrobe di 6:00’or di atardi pa 7:00’or di anochi.
Es ku tin derechi di voto ainda tin tempu te ku djárason 22 di novèmber promé ku 3:00’or di atardi pa depositá su voto na e büró di vota pa medio di karta na Kòrsou, situá na Representashon di Hulanda na Willemstad na Scharlooweg 55. Despues di 3:00’or di atardi, pa lei, e büró di vota pa medio di karta no por tuma mas voto.