Sekretario di Estado Maarten van Ooijen di Salubridat Públiko, Bienestar i Deporte ta bishitá Boneiru i Kòrsou di 5 te ku 10 di yüni
Sekretario di Estado Maarten van Ooijen di e ministerio di Salubridat Públiko, Bienestar i Deporte (VWS) ta hiba un bishita di trabou pa Boneiru i Kòrsou di 5 te ku 10 di yüni. E temanan mas importante ku ta planiá pa e bishita i kombersashonnan ta e kuido, kuido pa hóben i pasado di sklabitut den relashon na salú den e parti Karibense di Reino i tambe e vierlandenoverleg ku ta tuma lugá anualmente.
Boneiru
Riba djamars, 6 di yüni sekretario di estado Van Ooijen ta kuminsá e dia ku un enkuentro ku e Kolegio Ehekutivo di Boneiru i despues ta hiba un kombersashon ku FuHiKuBo i e plataforma diálogo pasado di sklabitut Boneiru. E sekretario di estado ta papia ku algun dòkter di kas i e organisashon general di dòkternan di kas, PCC. Simultáneamente na tur isla sekretario di Estado Van Ooijen i diputado Kroon (Boneiru), Komisario di gobièrnu sentral Francis (Sint Eustatius) i diputado Heyliger (Saba) ta firma e akuerdonan atministrativo kaminda ta regla kuido pa hóben mihó na Hulanda Karibense. Tambe tin un enkuentro (físiko i online) ku diferente partido tokante di e implementashon i komienso di e trayekto sosten sosial na e tres islanan.
Kòrsou
Riba 7 di yüni e sekretario di estado ta yega Kòrsou. Riba 8 di yüni e ta hiba un bishita na Klínika Capriles i despues e ta djòin e vierlandenoverleg kaminda e mandatarionan konserní ta firma un dokumento final na klousura di e konsulta di dos dia.