Alumnonan ta papia di nifikashon di libertat i ta disfrutá di Vrijheidsmaaltijd
Ochenta alumno di Albert Schweitzer havo/vwo, Omega College, Radulphus College i Skaih Pre University tabata di bishita awe na Representashon di Hulanda na Willemstad, kaminda den kuadro di Dia di Liberashon nan tabatin un programa dushi i interaktivo.
Miéntras nan tabata disfrutá di un kuminda sukulento, e alumnonan a hiba un kombersashon ku otro i tambe ku trahadónan di Representashon di Hulanda i representantenan di Veilige Grenzen (RST, PG, Koninklijke Marechaussee, Wardakosta, Defensie i Buitenlandse Zaken) tokante di libertat i seguridat i kiko esaki ta nifiká pa nan. E konsepto aki kaminda partidonan ta disfrutá di kuminda miéntras nan ta dialogá riba e nifikashon di libertat, ta konosí komo e ‘Vrijheidsmaaltijden’.
Tur presente a haña un kaluroso bon biní di Representante Suplente di Hulanda na Kòrsou, Aruba i Sint Maarten, Judith Jeurissen, ku a konta kiko e ròl i tareanan di Representashon di Hulanda ta enserá. Despues a parti e grupo den gruponan mas chikitu i e diálogo por a kuminsá. Representante Suplente Judith Jeurissen na final a papia di ‘kombersashonnan sumamente balioso’ i a gradisí e hóbennan pa nan partisipashon.
E kuminda a keda prepará i sirbí pa studiantenan di klas 4 di Sint Paulus AGO. Esaki ta konta komo parti di nan eksámen. E resultado ofisial ta deskonosí ainda, pero segun Representashon di Hulanda ta kla: nan a slag!
