Bishita kontentu na Representashon di Hulanda na Willemstad
Riba dia Internashonal di Síndrome di Down, Elian Sambo, Nashauwn Dammers i D’Laïa Lodowica Luijando e siman aki a honra koleganan di Representashon di Hulanda na Willemstad ku un bishita. E muchanan tabata kompañá pa miembronan di e asosiashon di mayor di Totolika i di e fundashon Down Syndrome Awareness Curaçao.
Ámbos instansia ta trata na krea mas konsientisashon na Kòrsou tokante e síndrome di Down i a konta Representante Suplente di Hulanda na Kòrsou, Aruba i Sint Maarten, Judith Jeurissen, di e esfuersonan ku ta tuma lugá den e kuadro aki. Judith Jeurissen a papia di un aporte sumamente balioso di e dos organisashonnan i a indiká ku Representashon di Hulanda gustosamente ta sostené esaki. Na final tur hende a pose pa un potrèt ku e famoso ‘happy socks’.
