25 Miembro pa promé kolegio elektoral di no-residente
Despues di konta i kùr e registrashonnan di Hulandes bibá den eksterior, a resultá ku 37.173 persona ku derecho di voto a registrá pa e promé kolegio elektoral pa no-residente. Na Kòrsou 449 persona ku derecho di voto a registrá; na Aruba 186 persona; i na Sint Maarten 59.
Te 1 di febrüari Hulandes den eksterior por a registrá na e munisipio di Den Haag pa vota pa e elekshon nobo di 15 di mart. A base di e kantidat di registrashon por skohe 25 miembro pa e kolegio elektoral.
E elekshon kolegio elektoral di no-residente pa Eerste Kamer ta nobo i e munisipio Den Haag tabatin 4 luna pa prepará e tipo di elekshon nobo aki. Alkalde Jan van Zanen: “Den bista di e miembronan di e urna elektoral sentral, ya kaba tin un interes grandi serka votadó- i partidonan polítiko pa e elekshon pa e kolegio elektoral nobo. A logra pa den un tempu kòrtiku registrá un gran kantidat di votadó den eksterior pa e elekshon nobo aki. Nos ta haña esaki importante, paso kada voto ta konta.”
Riba 5 di yüli Eerste Kamer a akordá un kambio den e konstitushon ku ta hasi e elekshon aki posibel. Personanan ku derecho di voto ku ta biba den eksterior, por vota pa 129 kandidato di 27 pais; 12 partido polítiko i 1 kandidato independiente. Registrashon ta nesesario pa kada elekshon; esaki ta determiná pa pais. Pa e motibu aki votadónan ku ya tabata registrá pa un otro elekshon, mester a registrá di nobo pa e elekshon pa e kolegio elektoral nobo. Pues, no ta tur persona ku derecho di voto den eksterior ta registrá ainda pa e elekshon pa kolegio elektoral. Historia ta demonstrá ku e kantidat di persona ku derecho di voto ta krese ku kada elekshon. Munisipio Den Haag ta hiba kampaña durante tur elekshon pa asina informá Hulandes den eksterior tokante e elekshon i registrashon.