Seshon di informashon tokante víktimanan di ‘toeslagenaffaire’ na Kòrsou
Ministerio di Finansa na Hulanda a traha un programa pa duna sosten na mayor i famianan ku a bira víktima di e ‘toeslagenaffaire’.
E sosten ta dirigí entre otro riba kompensashon finansiero pa e doló ku e mayornan a pasa aden pa motibu di fayo dor di gobièrnu i alabes pa rekuperashon i solushon di e debenan ku hopi famia a krea pa motibu di e fayo aki. Na Kòrsou tambe tin víktima di e ‘toeslagenaffaire’. For di yüli a lanta un tim ku ta yuda mayor i famianan pafó di Hulanda ku a bira víktima. Esaki ta e asina yamá tim di sosten pa mayornan den eksterior (OTB). Di e tim aki tin 4 persona aktivo na Kòrsou. E personanan aki konosé e situashon sosial di e islanan, nan ta konosí ku e kultura i ta papia e idioma.
Huntu ku Representashon di Hulanda na Willemstad (VNW) e tim lokal di OTB a disidí pa organisá un enkuentro informativo pa instansianan lokal. Bo Melchers, konsehero di maneho senior na VNW, a habri e enkuentro aki, ku a tuma lugá awe na ofisina di VNW na Skalo, i despues e lider di proyekto i mènedjer di OBT a duna e representantenan di instansianan lokal informashon di e problemátika i di e impakto riba mayor i famianan. Tambe a duna splikashon di e trabou di OTB i di e ròl di e organisashonnan. Konosementu di lokual a tuma lugá por kontribuí na solushonnan lokal pa e famianan víktima.
Desde awe víktimanan por mèldu na Representashon di Hulanda na Willemstad, via e number di telefòn +5999 4343200. VNW ta yuda dirigí e víktimanan na e persona di kontakto korekto.