Aruba ta pone promé paso pa gradualmente eliminá rekorte di salario

Notisia | 24-06-2022 | 17:57

Sekretario di estado Alexandra van Huffelen di Relashonnan den Reino ke ofresé Aruba, Kòrsou i Sint Maarten espasio pa gradualmente eliminá e rekorte di salario. E ta kontentu ku Aruba por dal e promé paso. “Tur hende por mira ku e kostonan di bida ta oumentá konsiderablemente. Ta lógiko e ora ei pa konsiderá eliminashon gradualmente di e rekorte di salario. Ta genial ku Aruba ta mira oportunidat pa hasi esaki awor.”

Pa gradualmente eliminá e rekorte di salario Hulanda a spesifiká e siguiente kondishonnan:

• Introdukshon di e ‘landsverordening normering topinkomens’.
• Mester buska e sèn pa eliminashon gradualmente kompletu òf parsial den propio presupuesto. C(A)ft ta kontrolá esaki.
• Na momento ku eliminá e rekorte di salario kompletamente, no por tin défisit riba e presupuesto, a ménos ku surgi sirkunstansia imprevisto.
• E deskuento di 25% riba salario di personanan ku funshon polítiko pa e momentonan aki ta keda vigente.

Ademas a puntra e paisnan, ku si ta posibel, durante di e eliminashon:

• En todo kaso pa laga oumentá e entradanan mas abou komo promé, pa motibu ku e kolaboradornan ei ta esnan mas afektá pa e subida di preisnan
• Pa keda tene i tin na bista e anteriormente moderashon di kondishonnan di trabou akordá den e paketenan di pais.
• Pa para ketu na e echo ku e eliminashon gradualmente di e rekorte, e salario di algun funshonario di gobièrnu por ta superior kompará ku esun di personanan ku funshon polítiko ku ta keda mantené deskuento di 25%.

Sekretario di estado Van Huffelen ta spera ku Kòrsou i Sint Maarten pronto tambe lo bai pone paso pa gradualmente eliminá e rekorte di salario. Pa no mester warda te un próksimo konseho di minister di Reino durante di resès den verano, huntu ku minister di Finansa e tin outorisashon pa evaluá si ta kumpli ku e kondishonnan i tuma medida tokante di esaki.