Trahando huntu pa dal un stap nobo den Relashonnan di Reino
Mehora nivel di bida, kuida i protehá naturalesa i medioambiente i traha riba bon enseñansa i un ekonomia mas diverso. Eseinan ta temanan prinsipal ku Sekretario di Estado Alexandra Van Huffelen ta bai traha riba dje e próksimo añanan. Den e karta ku el a manda awe pa Tweede Kamer e ta anunsiá ku pa logra esei, kooperashon a base di igualdat ta e punto di salida di tur su esfuersonan.
Den e karta e Sekretario di Estado ta deskribí e oportunidat- i retonan pa e parti Karibense di Reino. Di 11 te ku 24 di febrüari el a bishita e seis islanan. E ta konstatá despues di e bishitanan ei ku kada un di e islanan tin nan propio nesesidatnan i ku tin mester pues di un aserkamentu na midi.
“E islanan ta ofresé masha hopi oportunidat mes, basta e abitantenan haña oportunidat pa probechá di nan”, e Sekretario di Estado ta bisa. “Mi ta mira komo mi enkargo pa duna sosten den esei. Huntu ku gobernante- i abitantenan di e parti Karibense di Reino mi kier bai traha duru pa logra esei. Naturalmente respetando tambe e posishon outónomo den e mesun Reino ey.”
Sekretario di Estado Van Huffelen na promé instante ta preokupá pa e pobresa ku el a mira riba e islanan. “No opstante e esfuersonan di e gabinetenan anterior, mi ta konstatá ku e hendenan na Boneiru, Saba i Sint-Eustatius no ta ripara esei sufisientemente den nan pòtmòni.”
Den e akuerdo di gobernashon a palabra ku strukturalmente tin 30 mion euro disponibel pa Hulanda Karibense, banda di 35 mion euro pa konservashon i restorashon di naturalesa.
Pa loke ta trata e Sekretario di Estado, kooperashon a base di igualdat ta para sentral den e relashon ku e paisnan Aruba, Kòrsou i Sint Maarten. “Tur e tres paisnan ta parti igual di Reino i esei ta e base riba kua nos ta traha huntu riba futuro.“
Retonan ku e paisnan ta enfrentá den esei ta entre entre otro e pobresa kresiente, falta di kapasidat di implementashon i un estado di derecho ku mester di refuerso. “Ta retonan serio pa kua nos mester probechá di e forsa di Reino. E paisnan ta na turno pa traha riba solushonnan, pero den esei nan no ta nan so pará. Esei ta nifiká tambe ku nos ta komprometí ku bon gobernashon i gobernashon íntegro, ku ta komprometí pa garantisá derechonan humano.”
Ta intenshon pa huntu ku e islanan i e ministerionan konserní, sigui detayá e plannan den e karta di prioridatnan di maneho (hooflijnenbrief). Kamer ta risibí resultado di esei promé ku zomer.